ବ୍ୟୁରୋ: ଜାତୀୟ ବିଜ୍ଞାନ ଶିକ୍ଷା ଓ ଗବେଷଣା ପ୍ରତିଷ୍ଠାନ (ନାଇଜର) ଭୁବନେଶ୍ୱରରେ ପରମାଣୁ ଶକ୍ତି ବିଭାଗ(ଡିଏଇ)ର ପ୍ରଥମ କନ୍କ୍ଲେଭ ତଥା ପ୍ଲାଟିନମ୍ ଜୁବୁଲି ଉଦଘାଟିତ ହୋଇଯାଇଛି । ଏହି ଉଦଘାଟନୀ ଉତ୍ସବରେ ସଭାପତିତ୍ବ କରି ପରମାଣୁ ଶକ୍ତି ବିଭାଗର ସଚିବ ଡ. ଅଜିତ୍ ମହାନ୍ତି କହିଛନ୍ତି ଭାରତର ପ୍ରମୁଖ ବିଭାଗ ଡିଏଇ ଯେଉଁ କ୍ଷେତ୍ରରେ ସଫଳତା ଅର୍ଜନ କରିଛି ଆଉ ଯେଉଁ କ୍ଷେତ୍ରରେ ଗବେଷଣା ଜାରି ରହିଛି ତାହା ଏହି କନ୍କ୍ଳେଭରେ ଉପସ୍ଥାପିତ ହେବ, ଫଳରେ ଆଗାମୀ ଦିନରେ ଗବେଷଣା ବିସ୍ତାରିତ ହେବ ।
ମୁଖ୍ୟ ଅତିଥି ଭାବେ ଯୋଗ ଦେଇ ପଦ୍ମ ବିଭୁଷଣ ଅନିଲ କାକେଦକର କହିଛନ୍ତି ବିଭିନ୍ନ ଅନୁଷ୍ଠାନରେ ହେଉଥିବା ଗବେଷଣା ନିର୍ଦ୍ଦିଷ୍ଟ ଲକ୍ଷ୍ୟରେ ହେବା ବାଞ୍ଛନିୟ । ପ୍ରଥମ କନ୍କ୍ଳେଭକୁ ଓଡିଶାର ନାଇଜରଠାରେ ଅନୁଷ୍ଠିତ ହୋଇଥିବାରୁ ସେ ଖୁସି ବ୍ୟକ୍ତ କରି କହିଲେ ଯେ ଓଡିଶାରେ ଥିବା ଗବେଷଣାର କ୍ଷେତ୍ର ଏବଂ ଓଡିଶା ବୈଜ୍ଞାନିକଙ୍କୁ ପ୍ରୋତ୍ସାହିତ କଲେ କନ୍କ୍ଳେଭର ଉଦ୍ଦେଶ୍ୟ ଫଳପ୍ରଦ ହେବ । ସମ୍ମାନୀତ ଅତିଥିଭାବେ ଯୋଗ ଦେଇ ପ୍ରାକ୍ତନ ପରମାଣୁ ଉର୍ଜା କମିଶନର ଅଧ୍ୟକ୍ଷ ଡ.କେ. ଏନ୍. ବ୍ୟାସ କହିଲେ ଏହି କନକ୍ଲେଭରେ ଡିଏଇର ସଫଳତା ପ୍ରଦର୍ଶିତ ହେବ, ଆଗାମୀ ଦିନରେ ଡିଏଇର ଗବେଷଣା ତ୍ବରାନ୍ବିତ ହେବା ସଂଗେ ସଂଗେ ଏହା ମାନବ ସେବାରେ ଲାଗିବ। ମୁଖ୍ୟବକ୍ତା ଭାବେ ଯୋଗ ଦେଇ ଭାରତ ସରକାରଙ୍କ ପ୍ରାକ୍ତନ ବିଜ୍ଞାନ ପରାମର୍ଶଦାତା ପ୍ରଫେସର ବିଜୟ ରାଘବନ୍ କହିଲେ ବିଜ୍ଞାନ ଗବେଷଣାରେ ନିୟୋଜିତ ଥିବା ପ୍ରତିଷ୍ଠାନମାନେ ସେମାନଙ୍କର ଉପଲବ୍ଧିକୁ ସର୍ବସାଧାରଣରେ ପ୍ରକାଶ କଲେ ହିଁ ସେଥୁରୁ ଉନ୍ନତ ଗବେଷଣାର ଆଧାର ମିଳିଯିବ, ଫଳରେ ଦେଶର ବିଜ୍ଞାନ ଆହୁରି ଆଗକୁ ଯିବ ।
ଏହି ଉଦଘାଟନୀ ଉତ୍ସବରେ ନାଇଜରର ନିର୍ଦ୍ଦେଶକ ପ୍ରଫେସର ହିରେନ୍ଦ୍ର ନାଥ ଘୋଷ ନାଇଜର ଗବେଷଣାରେ ମିଳିଥିବା ସଫଳତାକୁ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ବୈଜ୍ଞାନିକଙ୍କୁ କହିଥିଲେ । ଏହି ଉତ୍ସବକୁ ନାଇଜରର କୁଳସଚିବ ଡ. ଅଭୟ ନାୟକ ସଞ୍ଚାଳନ କରିଥିଲେ । ଶେଷରେ କନ୍କ୍ଳେଭର ସଂଯୋଜକ ପ୍ରଫେସର ପାଲୋକ ଆଇନ୍ ଧନ୍ୟବାଦ ଅର୍ପଣ କରିଥିଲେ ।